અફીણ-પોષડોડાના ગેરકાયદે વેચાણ પર દરોડો: બાલાસરમાંથી રૂ.૧.૯૭ લાખનો મુદ્દામાલ જપ્ત

પૂર્વ કચ્છ જિલ્લામાં નશાના કારોબારને જડમૂળથી ઉખાડી ફેંકવા માટે શરૂ કરાયેલા ‘NO DRUGS IN EAST KUTCH CAMPAIGN’ હેઠળ બાલાસર પોલીસે મોટી સફળતા મેળવી છે.બોર્ડર રેન્જ IG ચિરાગ કોરડીયા  અને પૂર્વ કચ્છ જિલ્લા પોલીસ વડા સાગર બાગમાર તેમજ ભચાઉ ડિવિઝનના DYSP સાગર સાંબડાના માર્ગદર્શન હેઠળ રાપર PI આર.એલ. ખટાણા અને બાલાસર PSI ડી.આર. ગઢવી સહિતની ટીમ જ્યારે પેટ્રોલિંગમાં હતી, ત્યારે ખાનગી રાહે ચોક્કસ બાતમી મળી હતી કે બાલાસર ગામના ખીમાણીવાસ વિસ્તારમાં રહેતા કાનજીભાઈ હિરાભાઈ ચવાણ (રજપૂત) અને દેવાભાઈ હિરાભાઈ ચવાણ (રજપૂત) પોતાના રહેણાક મકાનમાંથી ગેરકાયદેસર અફીણ તથા પોષડોડાનું વેચાણ કરી રહ્યા છે.
બાતમીના આધારે પોલીસે સરકારી પંચોને સાથે રાખી મકાનમાં સફળ દરોડો પાડ્યો હતો. આ કાર્યવાહી દરમિયાન સ્થળ પરથી 48 વર્ષીય કાનજીભાઈ હિરાભાઈ ચવાણ મળી આવતા પોલીસે મકાનની તપાસ હાથ ધરી હતી. તલાશી દરમિયાન મકાનમાંથી 347 ગ્રામ અફીણ અને 1.486 કિલોગ્રામ પોષડોડા સહિત ડિજિટલ વજન કાંટો, મોબાઇલ ફોન અને દસ્તાવેજો મળી કુલ ₹1,97,290નો મુદ્દામાલ જપ્ત કરવામાં આવ્યો છે.
બાલાસર પોલીસે ઝડપાયેલા કાનજીભાઈ ચવાણની અટકાયત કરી છે, જ્યારે ફરાર દેવાભાઈ ચવાણને સહ-આરોપી દર્શાવી બંને વિરુદ્ધ NDPS એક્ટ-1985 હેઠળ કાયદેસરની કાર્યવાહી હાથ ધરી છે. બાલાસર પોલીસના આ સફળ દરોડાથી પૂર્વ કચ્છમાં ગેરકાયદે માદક પદાર્થોના વેપાર સાથે સંકળાયેલા તત્વોમાં ભારે ફફડાટ વ્યાપી ગયો છે.

આર.એલ. ખટાણા – પોલીસ ઈન્સ્પેક્ટર (PI), રાપર પોલીસ સ્ટેશન
ડી.આર. ગઢવી – પોલીસ સબ ઈન્સ્પેક્ટર (PSI), બાલાસર પોલીસ સ્ટેશન
સુમતીભાઈ પુનાભાઈ પરમાર – એ.એસ.આઈ., બાલાસર પોલીસ સ્ટેશન
ભાણજીભાઈ રામભાઈ પ્રજાપતી – પોલીસ હેડ કોન્સ્ટેબલ, બાલાસર પોલીસ સ્ટેશન
બાબુભાઈ હાજાભાઈ કાલોત્રા – પોલીસ હેડ કોન્સ્ટેબલ, રાપર પોલીસ સ્ટેશન
ગોકળભાઈ ભગવાનજી પટેલ – પોલીસ કોન્સ્ટેબલ, બાલાસર પોલીસ સ્ટેશન
કિરણભાઈ ભરતભાઈ તરાલ – પોલીસ કોન્સ્ટેબલ, બાલાસર પોલીસ સ્ટેશન
ચેતનાબેન દિનેશભાઈ વાળા – વુમન પોલીસ કોન્સ્ટેબલ, બાલાસર પોલીસ સ્ટેશન

(રિપોર્ટ: બાબુભાઈ આહીર)